భారీ నిడివితో వస్తున్న చరణ్.. ‘పెద్ది’ సెన్సార్ రిపోర్ట్ ఇదే!

మెగా ప‌వ‌ర్‌స్టార్‌ రామ్‌చరణ్, 'ఉప్పెన' ఫేమ్ దర్శకుడు బుచ్చిబాబు సానా కాంబినేషన్‌లో వస్తున్న పాన్ ఇండియా చిత్రం ‘పెద్ది’పై నెలకొన్న భారీ అంచనాల నడుమ ఒక ముఖ్యమైన అప్‌డేట్ వచ్చింది. ప్రపంచవ్యాప్తంగా జూన్ 4న గ్రాండ్ రిలీజ్‌కు సిద్ధమవుతున్న ఈ సినిమా, తాజాగా సెన్సార్ కార్యక్రమాలను పూర్తి చేసుకుంది. ఈ చిత్రానికి సెన్సార్ బోర్డు నుంచి క్లియరెన్స్ లభించడమే కాకుండా, సినిమా రన్‌టైమ్‌పై కూడా స్పష్టత వచ్చింది. ‘పెద్ది’ చిత్రం ఏకంగా 3 గంటల 9 నిమిషాల (189 నిమిషాలు) భారీ నిడివితో ప్రేక్షకుల ముందుకు రానుంది.

సాధారణంగా నేటితరం కమర్షియల్ చిత్రాల నిడివి రెండున్నర గంటల లోపే ఉండేలా దర్శక నిర్మాతలు జాగ్రత్తలు తీసుకుంటారు. కానీ, దర్శకుడు బుచ్చిబాబు కథపై ఉన్న బలమైన నమ్మకంతో భారీ రన్‌టైమ్‌కే మొగ్గు చూపారు. ‘రంగస్థలం’ తర్వాత రామ్‌చరణ్ కెరీర్‌లో ఇంతటి సుదీర్ఘ నిడివి ఉన్న సినిమా ఇదే కావడం విశేషం. కథలోని బలమైన భావోద్వేగాలు, నాటకీయత ప్రేక్షకులను ఆద్యంతం కట్టిపడేస్తాయని, ఎక్కడా కథనం నెమ్మదించిన ఫీలింగ్ కలగదని చిత్ర యూనిట్ ధీమాగా ఉంది. ఇటీవల ‘పుష్ప 2’, ‘ధురంధర్ 2’ వంటి భారీ చిత్రాలు మూడు గంటలకు పైగా నిడివితోనూ ఘన విజయం సాధించడంతో ‘పెద్ది’ రన్‌టైమ్ కూడా సినిమాకు ప్లస్ అవుతుందని మేకర్స్ భావిస్తున్నారు.

ఈ సినిమా కథ 1980ల నాటి గ్రామీణ నేపథ్యంలో సాగే ఒక పవర్‌ఫుల్ రస్టిక్ స్పోర్ట్స్ డ్రామాగా తెరకెక్కింది. అప్పటి గ్రామీణ ప్రాంతాల్లోని క్రీడలు, మనుషుల మధ్య పంతాలు, పట్టింపుల చుట్టూ కథ నడుస్తుంది. ఈ పాత్ర కోసం రామ్‌చరణ్ పూర్తిగా డీ-గ్లామర్ లుక్‌లోకి మారిపోయారు. ఆయన శారీరక మార్పు, పడిన కష్టంపై సినీ ప్రముఖులు, అభిమానుల నుంచి ప్రశంసలు వెల్లువెత్తుతున్నాయి. వింటేజ్ బ్యాక్‌డ్రాప్, హై-వోల్టేజ్ యాక్షన్ సన్నివేశాలు సినిమాకు ప్రధాన ఆకర్షణగా నిలవనున్నాయి.

‘పెద్ది’లో చరణ్ వన్ మ్యాన్ షో.. క్లైమాక్స్ హైలైట్ 
ఇక, సెన్సార్ బృందం నుంచి ‘పెద్ది’ చిత్రానికి అద్భుతమైన స్పందన లభించినట్టు ఇండస్ట్రీ వర్గాల్లో ప్రచారం జరుగుతోంది. సినిమా చూసిన సభ్యులు దర్శకుడు బుచ్చిబాబు మేకింగ్‌ను, రామ్‌చరణ్ నటనను ప్రత్యేకంగా అభినందించారని సమాచారం. ముఖ్యంగా మూడు గంటల పాటు కథనం ఎక్కడా పట్టుసడలకుండా సాగిందని, క్లైమాక్స్ సన్నివేశాలు థియేటర్లలో ప్రేక్షకులకు గూస్‌బంప్స్ తెప్పించడం ఖాయమని సెన్సార్ టాక్ బలంగా వినిపిస్తోంది. వృద్ధి సినిమాస్ పతాకంపై వెంకట సతీశ్ కిలారు నిర్మిస్తున్న ఈ చిత్రంపై తాజా అప్‌డేట్స్‌తో అంచనాలు మరింత పెరిగాయి.